Day: May 8, 2019

அரசு மருத்துவமனையில் அப்பாவி மக்கள் உயிரிழக்க காரணமான சுகாதாரத்துறைக்கு மு.க.ஸ்டாலின் கண்டனம்

சென்னை: அரசு மருத்துவமனையில் அப்பாவி மக்கள் உயிரிழக்க காரணமான தமிழக அரசு சுகாதாரத்துறைக்கு திமுக தலைவர் மு.க.ஸ்டாலின் கண்டனம் தெரிவித்துள்ளார். மதுரை அரசு மருத்துவமனையில் மின்தடையால் அப்பாவி உயிர்கள் பலியாகி இருப்பது கவலையளிக்கிறது. அரசு நிர்வாகமும், சுகாதார துறையின் அலட்சியமே முழுக்காரணம். எடப்பாடி பழனிசாமி அரசு முழுப்பொறுப்பு ஏற்பதோடு தக்க நடவடிக்கை எடுக்க வேண்டும், பாதிக்கப்பட்டவர்களுக்கு நீதியும், நிவாரணமும் தேவை என்று மு.க.ஸ்டாலின் தனது டுவிட்டர் பக்கத்தில் பதிவிட்டுள்ளார்.

தூத்துக்குடி மாவட்டம் முழுவதும் நாளை மாலை 6 மணி முதல் 12-ம் தேதி காலை 6 மணி வரை 144 தடை உத்தரவு

தூத்துக்குடி: தூத்துக்குடி மாவட்டம் முழுவதும் நாளை மாலை 6 மணி முதல் 12-ம் தேதி காலை 6 மணி வரை 144 தடை உத்தரவு பிறப்பிக்கப்படும் என தூத்துக்குடி மாவட்ட ஆட்சியர் கூறியுள்ளார். மேலும் பாஞ்சாலங்குறிச்சியில் மே 10 மற்றும் 11-ம் தேதிகளில் நடைபெறவுள்ள வீரசக்கதேவி ஆலய திருவிழாவில் அசம்பாவிதங்களை தடுக்கும் பொருட்டு 144 தடை உத்தரவு பிறப்பிக்கப்பட்டுள்ளதாக கூறினார்.

டெல்லியில் வரும் 21-ல் ராகுல் காந்தி தலைமையில் எதிர்க்கட்சிகள் கூட்டம் என தகவல்

டெல்லி: டெல்லியில் வரும் 21-ம் தேதி காங்கிரஸ் தலைவர் ராகுல் காந்தி தலைமையில் அனைத்து எதிர்க்கட்சிகள் ஆலோசனை கூட்டம் நடைபெற உள்ளதாக தகவல் வெளியாகியுள்ளது. 19-ம் தேதி நாடாளுமன்ற தேர்தல் வாக்குப்பதிவு முடிய உள்ள நிலையில், தேர்தலுக்கு பிந்தைய வியூகங்கள் குறித்து ஆலோசிக்கப்பட்ட வாய்ப்பு உள்ளதாக தெரிவிக்கப்படுகிறது.

திருப்பரங்குன்றம் சட்டமன்றத் தொகுதி திமுக வேட்பாளர் சரவணனுக்கு ஆதரவாக வைகோ வாக்கு சேகரிப்பு

திருப்பரங்குன்றம்: திருப்பரங்குன்றம் சட்டமன்றத் தொகுதி திமுக வேட்பாளர் சரவணனுக்கு ஆதரவாக வைகோ வாக்கு சேகரித்து வருகிறார். சரவணனுக்கு உதயசூரியன் சின்னத்தில் வாக்களிக்க கோரி நாகமலையில் மதிமுக பொதுச்செயலாளர் வைகோ பிரச்சாரம் செய்து வருகிறார். திமுக வேட்பாளர் சரவணன் தாம் எடுத்தக் காரியத்தை எப்பாடுபட்டாவது நிறைவேற்றக்கூடியவர் எனவும் கூறினார். 

ஆந்திரா படுவா வனப்பகுதியில் பாதுகாப்பு படையினரால் மாவோயிஸ்ட் 5 பேர் சுட்டுக் கொலை

ஐதராபாத்: ஆந்திர மாநிலம் படுவா வனப்பகுதியில் மாவோயிஸ்ட் அமைப்பைச் சேர்ந்த 3 பெண்கள் உட்பட 5 பேர் சுட்டுக் கொல்லப்பட்டுள்ளனர். மாவோயிஸ்ட்கன் பதுங்கியிருப்பதாக வந்த தகவலின்பேரில் தேடுதல் வேட்டையில் ஈடுபட்ட பாதுகாப்பு படையினர் 5 மாவோயிஸ்ட்களை சுட்டுக்கொன்றனர்.